Боздиди дабири кулли САҲА аз Қирғизистон

Дабири кулли САҲА аз Қирғизистон боздид кард ва бар аҳамияти ҳамкории минтақавӣ таъкид намуд
Дабири кулли Созмони амният ва ҳамкорӣ дар Аврупо (САҲА) Феридун Ҳ. Синирлиоғлу сафари расмии худро ба Қирғизистон анҷом дода, аз уҳдадории устувори созмон барои дастгирии авлавиятҳои миллии ин кишвар ва таҳкими ҳамкории минтақавӣ дар Осиёи Марказӣ хабар дод.

Дар ҷараёни сафар ба Бишкек, дабири кулл бо президенти Қирғизистон Содир Ҷапаров, вазири корҳои хориҷӣ Жээнбек Кулубаев ва раиси парлумон (Жогорку Кенеш) Марлен Маматалиев мулоқот анҷом дод. Дар ин дидорҳо масъалаҳои марбут ба шарикии устувори САҲА бо Қирғизистон, нақши фаъоли кишвар дар ҳалли масъалаҳои минтақавӣ ва имкониятҳои густариши ҳамкорӣ дар Осиёи Марказӣ мавриди баррасӣ қарор гирифтанд.

Ба гуфтаи Синирлиоғлу, Қирғизистон яке аз шарикони муҳимми САҲА ба ҳисоб рафта, дар рушди муколама ва ҳамкории минтақавӣ нақши созанда мебозад. Ӯ таъкид кард, ки боздиди ӯ ба минтақа баъд аз як соли ба имзо расидани созишномаи делимитатсияи сарҳад миёни Қирғизистон ва Тоҷикистон, инчунин пас аз як соли қабули Эъломияи Хуҷанд миёни Қирғизистон, Тоҷикистон ва Ӯзбекистон сурат мегирад. Ба гуфтаи ӯ, ин рӯйдодҳои дипломатии соли 2025 намунаи амалӣ шудани принсипҳои САҲА буда, нишон медиҳанд, ки таҳкими эътимод метавонад ҳатто минтақаҳои нооромро ба фазои ҳамкорӣ табдил диҳад.

Дар мулоқот бо роҳбарияти кишвар, дабири кулл барои ҳамкории мутақобил изҳори сипос намуда, омодагии Котиботи САҲА-ро барои идомаи ҳамкориҳо дар самти таҳкими субот ва рушди устувор дар минтақа таъкид кард.

Дар доираи барномаи сафар, ӯ ҳамчунин аз Академияи САҲА дар Бишкек боздид намуд, ки яке аз лоиҳаҳои калидии созмон дар минтақа ба шумор меравад ва дар тӯли беш аз бист сол таҳсилоти босифат ва муколама дар масъалаҳои амният ва рушди минтақавиро таъмин мекунад.

Ҳамчунин, дабири кулл аз Дафтари барномавии САҲА дар Бишкек дидан карда, бо кормандон мулоқот анҷом дод. Ӯ фаъолияти кормандони созмонро баланд арзёбӣ намуда, барои саҳми онҳо дар татбиқи ваколатҳои САҲА ва дастгирии авлавиятҳои Қирғизистон изҳори қадрдонӣ кард.

Манбаъ: Дафтари матбуотии САҲА