Таҷҳизоти замонавӣ дар муассисаҳои таълимии Душанбе

Дар шаҳри Душанбе, дар натиҷаи барномаи давлатии таъмини муассисаҳои таълимӣ бо таҷҳизоти муосир шароити таҳсил беҳтар шуда, тамоми мактабҳо бо маводи замонавӣ таъмин шуданд. Илова бар ин, бо воридшавии платформаи «eDonish» технологияи рақамӣ ба таълим ворид шуда, ҳамкории муассир байни мактабҳо, хонандагон ва волидон таъмин гардидааст. Дар ин бора ба расонаҳои маҳаллӣ аз Раёсати маорифи пойтахт хабар додаанд

Бино ба маълумоти расонаишуда, таваҷҷуҳ ба тарзи ҳаёти солим ва назорати санитарӣ дар мактабҳо афзоиш ёфта, музди меҳнати омӯзгорон аз моҳи июли соли 2024 40% зиёд шудааст. Таъкид шудааст, ки ҳамаи талошҳо бояд барои тарбияи насли масъулиятшинос ва пешрафта равона шаванд.

Хабар нишон медиҳад, ки дар соҳаи маорифи Душанбе қадамҳои ҷиддӣ барои беҳтар кардани сатҳи таълим ва тарбия гузошта шудаанд. Иҷрои барномаҳои давлатӣ оид ба таъмини муассисаҳои таълимӣ бо таҷҳизоти замонавӣ ва маводи таълимӣ як ташаббуси мусбат аст. Ин имконият медиҳад, ки шароити таҳсил дар мактабҳо беҳтар шавад. Вале савол ин аст, ки оё ин таҷҳизот ба таври кофӣ истифода мешаванд ва натиҷаҳои дилхоҳ медиҳанд. Баъзан мушкилот дар сатҳи амалисозии чунин барномаҳо рух медиҳанд.

Воридшавии технологияҳои рақамӣ, бахусус платформаи «eDonish», метавонад як қадами муҳим дар самти идоракунии таълим ва назорати сифати он бошад. Платформа барои осон кардани ҳамкорӣ байни хонандагон, волидон ва мактабҳо муҳим аст. Аммо бояд сатҳи дониш ва малакаи омӯзгорон барои истифодаи ин платформаҳо такмил дода шавад. Агар омӯзгорон тавоноии кофӣ надошта бошанд, натиҷаҳои он метавонад нокифоя бошанд.

Таваҷҷуҳ ба саломатии ҷисмонӣ ва равонии хонандагон, аз ҷумла назорати ҳолати санитарӣ ва пешгирии бемориҳо, қадами мусбат аст. Вале барои таъсири дарозмуддат, ҷорӣ кардани барномаҳои таълимии тарзи ҳаёти солим муҳим аст. Саволе ба миён меояд, ки оё ин ташаббусҳо тамоми мактабҳоро фаро мегиранд ё танҳо ба муассисаҳои пешрафтаи маҳз пойтахт маҳдуд мешаванд.

Масъалаи мубориза бо ифротгароӣ ва пешгирии шомилшавии ҷавонон ба ҳаракатҳои деструктивӣ хеле муҳим аст. Мактабҳо бояд на танҳо дар таълим, балки дар тарбияи маънавӣ ва ахлоқии хонандагон низ саҳм гузоранд. Барои ин, омӯзгорон бояд мавод ва усулҳои муосир дошта бошанд, то онҳо ҷавононро дар рӯҳияи таҳаммулпазирӣ ва масъулиятшиносӣ тарбия кунанд.

Баландшавии музди меҳнат як иқдоми мусбат аст, ки сатҳи иҷтимоии омӯзгоронро беҳтар мекунад. Муҳим аст, ки ин афзоиш дар ҳамаи сатҳҳо ва минтақаҳо баробар татбиқ шавад. Қонуни пешниҳодшудаи «оид ба мақоми омӯзгор» низ қадами муҳимест, ки метавонад мақоми омӯзгоронро дар ҷомеа боз ҳам баланд бардорад.

Таъкид ба тарбияи насли масъулиятшинос ва ҳамаҷониба рушдёфта нишон медиҳад, ки мақсадҳои стратегӣ мавҷуданд. Барои расидан ба ин ҳадаф, низоми таълим бояд фарогир ва баробарҳуқуқ бошад. Таҳаввулоти зикршуда умедбахшанд, вале самаранокии онҳо аз иҷрои босифат ва шаффофи барномаҳо вобаста аст. Барои амалисозии ин ислоҳот, иштироки фаъолонаи омӯзгорон, хонандагон, волидон ва маъмурияти мактабҳо зарур аст.

Чизи дигаре, ки бояд зикр шавад ва дар боло ҳам ишора кардам он аст, ки ташаббусҳое, ки асосан ба пойтахт равона шудаанд, нишон медиҳанд, ки тамаркузи асосии барномаҳои давлатӣ бештар ба шаҳри Душанбе маҳдуд мегардад. Гарчанде беҳтар кардани сатҳи таълим дар пойтахт муҳим аст, чунин равиш метавонад боиси нобаробарии ҷиддӣ миёни мактабҳои пойтахт ва минтақаҳои дигар гардад.

Дар аксар ҳолатҳо, муассисаҳои таълимии минтақаҳо бо мушкилоти норасоии таҷҳизоти замонавӣ, шароити ғайрисанитарӣ ва камбуди мутахассисон рӯ ба рӯ мешаванд. Илова бар ин, воридсозии технологияи рақамӣ, ки унсури муҳими рушди таълим аст, дар мактабҳои дурдаст ба мушкил дучор мегардад. Дар натиҷа, хонандагон ва омӯзгорони минтақаҳо аз имкониятҳое, ки ҳамсолони онҳо дар пойтахт доранд, маҳрум мешаванд.

Барои ноил шудан ба рушди баробар ва фарогири низоми маориф, зарур аст, ки чунин барномаҳо ва ташаббусҳо на танҳо ба пойтахт, балки ба тамоми минтақаҳои кишвар равона карда шаванд. Танҳо дар сурати фаро гирифтани тамоми мактабҳои ҷумҳурӣ, имкони таъмини баробарии таълим ва рушди ҳаматарафа фароҳам мегардад.