И. Ёқубов: «Чаро то ҳол ҳеч таҳрими байналмилалӣ алайҳи ҳукумати Тоҷикистон ҷорӣ нашудааст?»
Дар конфронси солонаи САҲА (ОБСЕ) дар Варшава, Илҳомҷон Ёқубов, роҳбари Ассотсиатсияи муҳоҷирони Осиёи Марказӣ ва фаъоли маъруфи сиёсӣ суханронӣ карда, аз беамалии ҷомеаи ҷаҳонӣ нисбат ба поймолшавии ҳуқуқи инсон дар Тоҷикистон шадидан интиқод кард.
«Даҳ сол аз саркӯбии беамон мегузарад»
Ёқубов ёдовар шуд, ки моҳи сентябри соли 2015, даҳ сол қабл, даҳҳо узви Ҳизби наҳзати исломии Тоҷикистон, вакилони дифоъ, рӯзноманигорон ва фаъолони шаҳрвандӣ боздошт шуданд. Ду нафар аз онҳо ба ҳабси якумрӣ ва бархе аз 20 то 30 сол ба зиндон маҳкум гардиданд. Ба гуфтаи ӯ, роҳбарияти Тоҷикистон «бо беэътиноии комил ва боварӣ ба беҷазоии худ» ҳама талаботи созмонҳои байналмилалиро дар бораи озодии маҳбусони сиёсӣ рад мекунад ва нодида мегиранд.
Ӯ таъкид намуд, ки вазъ сол ба сол бадтар мегардад ва «ҳар моҳ хабари марги яке аз зиндониёни сиёсӣ мерасад». Дар ҷомеаи тоҷик, ба гуфтаи ӯ, ноумедӣ ҷой гирифтааст, мардум ва коршиносон дигар ба имкони таъсиргузорӣ ба ҳукумат ва озодии зиндониён бовар надоранд.
Чаро Режим таҳрим намешавад?
Илҳомҷон Ёқубов гуфт, ки озодшавии баъзе зиндониёни сиёсӣ дар Русия ва Беларус умеди нав бахшидааст, ки кишварҳои ғарбӣ метавонанд ба диктаторон таъсир расонанд. Аммо ӯ суол гузошт:
«Чаро ҷаҳон, бо вуҷуди доштани имкониятҳо ва механизмҳои ҳуқуқӣ, онҳоро нисбат ба ҳукумати Тоҷикистон истифода намекунад?»
Ӯ бо эҳсос изҳор дошт, ки маҳбусони сиёсӣ дар Тоҷикистон ҳатто бо «ҳасади сафед» ба ҳамтоёни рус ва беларуси худ менигаранд, зеро дар қисмати аврупоии пасошӯравӣ таваллуд шудаанд, ки таҳти таваҷҷӯҳи бештар қарор дорад.
«Равобити дугонаи Ғарб»
Ёқубов таъкид кард, ки то ҳол нисбати ҳукумати Тоҷикистон, ширкатҳо ва шахсони масъул ҳеч гуна таҳрими байналмилалӣ ҷорӣ нашудааст. Ӯ гуфт:
«Чаро муносибати ҷаҳони озод ба як мушкил, ба саркӯбии мухолифин ва озодандешон дар қисматҳои гуногуни қитъа яксон нест?»
Ӯ ёдовар шуд, ки вақте парвандаҳои Путин ва Лукашенко ба Додгоҳи байналмилалии ҷиноятҳо (МУС) ирсол шуданд, чандин давлати аврупоӣ онҳоро расман дастгирӣ карданд. Аммо вақте мухолифони тоҷик бо пуштибонии созмонҳои байналмилалӣ парвандаи ҳукумати Тоҷикистонро ба МУС ирсол намуданд, ҳеч кишвари аврупоӣ то ба ҳол ба он ҷиддӣ аҳамият намедиҳад.
Даъват ба амал
Ёқубов зикр кард, ки Тоҷикистон ягона кишвари Осиёи Марказист, ки Статути Римро имзо кардааст ва аз ин рӯ, Додгоҳи ҷиноятҳои байналмилалии Гаага метавонад нисбати Эмомалӣ Раҳмон амал кунад. Ӯ бо ишора ба сафари Владимир Путин ба Тоҷикистон гуфт:
«Имрӯз дар Тоҷикистон шахсе қарор дорад, ки нисбати ӯ қарори Додгоҳи ҷиноятҳои байналмилалии Гаага вуҷуд дорад, ва ӯро касе мепазирад, ки худ низ бо иттиҳоми ҷиноятҳои зидди башарият дар МУС таҳти таҳқиқ аст.»
Дар поёни суханрониаш Илҳомҷон Ёқубов аз кишварҳои узви САҲА ва тамоми ҷаҳони озод даъват кард, ки ду қадами муҳим бардоранд:
- Дастгирии расмии шикояти мухолифини тоҷик дар Додгоҳи ҷиноятҳои байналмилалии Гаага (МУС);
- Ҷорӣ кардани таҳримҳо алайҳи роҳбарияти Тоҷикистон, ба монанди он чи нисбат ба режими Лукашенко татбиқ шуд, то ба сарнавишти садҳо зиндонии сиёсӣ таъсир гузорад.
Ёқубов суханрониашро бо даъват ба виҷдони ҷамъиятии ҷаҳони озод анҷом дод:
«Барои озодии садҳо бегуноҳи дар зиндонҳо буда, вақт он расидааст, ки ҷаҳони озод аз сухан ба амал бигзарад.»
Average Rating