Асадулло Бобоев ба 17 соли зиндон маҳкум шудааст
Асадулло Бобоев, фаъоли мухолифи ҳукумати Тоҷикистон, ки моҳи июни соли ҷорӣ аз Олмон ихроҷ ва пас аз расидан ба Душанбе боздошт шуд, ба 17 соли зиндон маҳкум шудааст. Дар ин бора яке аз наздикони ӯ, ки нахост номаш ифшо шавад, ба Паём хабар дод.
Ба гуфтаи ин манбаъ, мурофиаи додгоҳии Бобоев рӯзи 21 сентябри соли 2026 баргузор шудааст. Дақиқан ин ҳамон рӯзест, ки матраҳ шудани қазияи Бобоев дар порлумони Олмон расонаӣ шуда буд. Фраксияи Ҳизби Чап дар Бундестаг бо пурсиши хаттии рақами 21/8061 аз ҳукумати федералӣ хоста буд, дар бораи ихроҷи ин фаъоли мухолиф ва сабабҳои боздошти ӯ дар Тоҷикистон маълумот диҳад. Тибқи хабарномаи Бундестаг аз 21 сентябри соли 2026, вакилон бо истинод ба Дидбони ҳуқуқи башар таъкид кардаанд, ки пеш аз Бобоев низ се фаъоли дигари мухолифи тоҷик пас аз ихроҷ аз Олмон фавран боздошт шудаанд.
Ҳанӯз маълум нест, ки кадом додгоҳ ҳукмро содир кардааст ва ӯ бар асоси кадом моддаҳои Кодекси ҷиноятӣ маҳкум шудааст. Нусхаи ҳукм дар ихтиёри «Паём» нест ва маълумоти наздики ӯ дар бораи муҳлати ҷазо то ин лаҳза аз манбаи мустақили дигар тасдиқ нашудааст. Мавқеи додгоҳ ва мақомоти тафтишотӣ дар бораи ҳукми гузоришшуда низ дастрас нест. Баробари дастрас шудани маълумоти иловагӣ ҳатман барои хонандагони Паём ТВ маълумот пешниҳод хоҳад шуд.
Асадулло Бобоев аз фаъолони ҳаракати мухолифи «Ислоҳот ва рушди Тоҷикистон» буд ва дар шабакаҳои иҷтимоӣ аз сиёсати ҳукумати Эмомалӣ Раҳмон интиқод мекард. Мақомоти Олмон ӯ ва писари 19-солааш Муҳаммадро рӯзи 20 июни соли 2026 ба Тоҷикистон ихроҷ карданд. Бино ба гузориши Дидбони ҳуқуқи башар, Бобоев баъди расидан ба Душанбе боздошт шуд, аммо писарашро ба наздиконаш супурданд. Ҳамсар ва ду духтари ӯ дар Олмон монданд.
Пеш аз ихроҷ Бобоев ба Радиои Озодӣ гуфта буд, ки дар Тоҷикистон ба сабаби навиштаҳои интиқодиаш дар шабакаҳои иҷтимоӣ алайҳи ӯ парвандаи марбут ба ифротгароӣ боз шудааст.
Дидбони ҳуқуқи башар рӯзи 7 июл ихроҷи ӯро танқид карда, аз мақомоти Олмон хост, сабабҳои бозгардондани фаъолро бо вуҷуди хатари боздошт ва бадрафторӣ таҳқиқ кунанд. Ба арзёбии ин созмон, фаъолияти интиқодии Бобоев ӯро дар Тоҷикистон дар маърази таъқиб қарор медод.
Дар охири моҳи август наздикони Бобоев хабар дода буданд, ки ӯ дар боздоштгоҳи Кумитаи давлатии амнияти миллии Тоҷикистон дар Душанбе нигоҳдорӣ мешавад. Ҳамсараш Мастона Файзуллоева рӯзи 27 август ба Радиои Озодӣ гуфта буд, ки бо гузашти беш аз ду моҳ хонавода натавонистааст бо ӯ рӯ ба рӯ мулоқот кунад. Ба гуфтаи ӯ, наздикон чанд бор ба боздоштгоҳ ғизо бурдаанд, аммо дар бораи шароити нигоҳдорӣ ва дастрасии Бобоев ба вакили мустақил маълумоти кофӣ надоштанд.
Дар ҳамон гузориш омада буд, ки мақомоти Тоҷикистон боздошт ва маҳалли нигоҳдории Бобоевро расман шарҳ надодаанд. Вазири корҳои дохилӣ Рамазон Раҳимзода моҳи июл ба хабарнигорон гуфта буд, ки аз сарнавишти ӯ хабар надорад.
Хабари маҳкумияти тӯлонии Бобоев нигарониҳои қаблӣ дар бораи сарнавишти фаъолони ба Тоҷикистон бозгардондашударо бештар мекунад. Акнун саволҳои асосӣ инанд, ки ӯ бо кадом иттиҳом маҳкум шудааст, чӣ далелҳое ба додгоҳ пешниҳод шудаанд ва оё имкони ҳимояи мустақил ва шикоят аз ҳукмро доштааст ё хайр.