ФАВРӢ: Муҳаммад Тағоев дар Гурҷистон нопадид шудааст
Блогер ва фаъоли тоҷик Муҳаммад Тағоев, ба гуфтаи манбаи «Паём ТВ», дар Гурҷистон нопадид шудааст. Манбаъ, ки чанд рӯз пеш бо ӯ тамос доштааст, мегӯяд, Тағоев аз рад шудани дархости паноҳандагияш аз ҷониби мақомоти судии ин кишвар ва хатари истирдод хабар дода буд.
Ба гуфтаи манбаи «Паём ТВ», то 2 ноябр 13 рӯз боз аз фаъолияти Тағоев дар шабакаҳои иҷтимоӣ дараке нест. Ин дар ҳолест, ки ӯ қаблан қариб ҳар рӯз дар Фейсбук матлабҳо, муроҷиатҳои видеоӣ ва суханрониҳои тунд алайҳи режими Тоҷикистон нашр мекард. Ин таваққуф дар фаъолияти онлайни ӯ нигарониҳоро бештар кардааст, аммо худ ба худ далели боздошт ё истирдод нест.
Ба гуфтаи манбаъ, Тағоев дар суҳбати охир аз вазъи худ нигаронӣ карда, гуфтааст, ки пас аз рад шудани дархости паноҳандагӣ ӯро истирдод таҳдид мекунад. «Паём ТВ» ҳанӯз нусхаи қарори судро дар ихтиёр надорад ва ҷузъиёти ҳуқуқии ин қарор маълум нест.
Ҳоло маҳалли ҳузури Тағоев ва шароити нопадидшавии ӯ рӯшан нест. Маълумоти мавҷуд барои тасдиқи боздошт ё анҷом шудани истирдоди ӯ кофӣ нест. Санаи дақиқи қатъ шудани тамос низ ҳанӯз мушаххас нашудааст. Аммо аз санаи 20 октябр ба ин сӯ дар шабакаҳои иҷтимоӣ чизе накоридааст.
Ба иттилои манбаи «Паём ТВ», дар саҳифаи фейсбукии Тағоев рӯзи 20 октябри соли 2026 як муроҷиати видеоӣ нашр шудааст. Манбаъ мегӯяд, ӯ дар ин навори тақрибан 30-дақиқагӣ аз мардум хостааст, ки ба мубориза кӯмак кунанд.
Муҳаммад Тағоев аз фаъолони тоҷик ва мунтақидони ҳукумати Тоҷикистон аст. Ӯ қаблан низ дар хориҷ аз кишвар бо хатари истирдод рӯбарӯ шуда буд.
Рӯзи 4 марти соли 2020 Тағоев дар шаҳри Алматои Қазоқистон бо дархости мақомоти Тоҷикистон боздошт шуд. Ҳомиёни ҳуқуқ он замон аз мақомоти Қазоқистон талаб карданд, ки ӯро ба Душанбе насупоранд. Онҳо ҳушдор медоданд, ки дар сурати истирдод ба ӯ шиканҷа ва зиндони тӯлонӣ таҳдид мекунад.
Моҳи марти соли 2022 Кумитаи шаҳрвандии наҷоти гаравгонҳо ва зиндониёни сиёсии Тоҷикистон аз озод шудани Тағоев ва дар ҷойи амн қарор доштани ӯ хабар дод.
Мавқеи мақомоти Гурҷистон ва Тоҷикистон дар бораи маълумоти кунунии нопадидшавии Тағоев ҳанӯз дар ихтиёри «Паём ТВ» нест.